طبعا حبيت أعمل الموضوع بالبلدى أصل مش هفضل أتكلم كلام محدش هيفهمه ولا أنا أصلا هفهمه , لكن نبسط الموضوع على بعض و نقول كلمة حق بقى , الجمارك و الضرايب هنتكلم فيهم حته واحدة مش كل واحدة لوحدها يعنى , و تعتبر الجمارك و الضرايب من الأموال السيادية التى يخضع لها الجميع وبتتوظف فى كذا حاجة لصالح الدولة بالتأكيد مفيده جدا لأى دولة لكن إذا تم توظيفها بشكل صحيح , المفروض بيكون فيه حد أدنى و حد أقصى للجمارك والضرايب دى سواء كانت دولة منتجه أو دولة أستهلاكيه , و الهدف من رفع سعر الجمارك والضرائب دائما حمايه المنتج المحلىو من هنا هتيجى الكارثة و الصدمه
طيب ماتيجى نقارن مصر بأيطاليا مثلا أو فرنسا
لما نيجى نقول أن أيطاليا بتعمل السيارة فيات بسعر مثلا 10 جنيه
دولة تانيه بتعمل مواصفات أعلى من الفيات الفنيه بتصميم تانى أفضل و بأسم تجارى تانى مثلا زى كيا بـ8 جنيه
هل مثلا لو الكيا دخلت فى أيطاليا بعد جمارك و ضرايب و سعرها بقى 10 جنيه برضة زى الفيات هل الفيات هتتباع ؟
بالتأكيد لأ فبيتم رفع سعر الجمارك و الضرايب لحماية المنتج المحلى إلى هوا مثلا الفيات عشان ميخسرش و دة يبيع و دة يبيع و إلى غاوى نزاهه ينقط بطاقيته زى مابيقولوا بس على الأقل كله هيتباع و الشعب هيكون راضى تماما عن قوانين الجمارك والضرايب
بس حاسب هنا , أيطاليا دولة منتجة , طيب مصر بقى !؟ مصر دولة أستهلاكيه زيها زى أى دولة عربيه بس الفرق أن فيه دول عربيه كتير بتراعى ظروف شعبها وعامله جمارك و ضرايب أقل بكتير من مصر لكن برضة دا ميمنعش أنها جماركها و ضرايبها أعلى كمان من المعترف بيه على المستوى الأوروبى و العالمى
لو جينا بصينا على مصر دولة أستهلاكية 100% يعنى مفيش صامولة بتتعمل فيها وكداب إلى يقول أن توكيل زى شيفروليه أو هيونداى أو الحاجات دى بتصنع حاجة لأ دا كدة أحنا بنضحك على بعض بقى , كل إلى بيحصل أن مفيش أنتاج فى مصر محلى تماما لكن كل إلى بيحصل أن السيارات دى بتيجى و بيتم تجميعها يعنى مفيش منتج محلى و لكن فيه توكيلات حط دة هنا و ركب دى هنا و بقيت عربيه من غير أى تصنيع
طيب النصوص و الأتفاقيات فى كل العالم بتقول أن الجمارك والضرايب عشان تحمى منتج محلى مش توكيل بتاع راجل أعمال
طيب من هنا بييجى دور الحكومة إلى بتوصل ساعات الضرايب + الجمارك = 300%
طيب أنت أية المنتج المحلى عندك عشان تخليها 300% بتحمى مين ؟ بتحمى غبور و أبو الفتوح و منصور !؟ و دلوقتى أى توكيل لما بيشوف العربيه بدأت تبيع عدد كبير بيرفعلك سعرها حوالى 20 ألف جنيه زيادة و شوفوا الدايو والهيونداى كانت بكام زمان و دلوقتى بقيت بكام
طيب سمعنا أن فيه دول مستهلكه زى مصر و الجمارك والضرايب على العربيات الأقل من 1300 سى سى الحد الأقصى للضرايب و الجمارك الأتنين مع بعض 15% يعنى أعلى حاجة ممكن تدفع 15% فى الدول دى عشان مستهلكه مفيش عندها أنتاج سيارات , لكن مصر بالنظام إلى بتعمله بتاع الـ300% دة كأن مصر دى مثلا ترسانه التصنيع الذى لم يسبق لها مثيل و يا أما تنتجوا لينا سيارة بالفعل يا أما الشعب كله هيعرف أن فيه سرقة فى الجمارك و الضرايب و الخبر فى مصر الحمد لله بقى ينتشر زى الصواريخ طيب فيه واحد شايفه بيفكر يقولى الدنيا زحمه و بنمشى فوق بعض و الكلام دة كله
متقلقش فيه موضوع فى نقس القسم بتاع الجمارك والضرايب و السرقة إن شاء الله قريب جدا هعمله
بيتكلم أنه مش ذنب الشعب المصرى الزحمه إلى معمولة دى بس طبعا مش هقدر أنكر أن فيه ناس السبب
3 التعليقات:
الكلام دة لازم يتنشر فى الوقت الحالى ده عشان الحكومه تعرف اننا صاحيين
dيا شباب لازم نتحرك والاخوان اهم ايام وحيكونو 70% فى البرلمان لازم يغيرو الوضع دا او يروحو يشوفو لهم شغله تانيه
انا عايز اشترى عربيه صغيره زى دايو لانوس مثلا الاقى سعرها 75 الف جنيه او 78 ليه يعنى دى واقفه على توكيلها ب 22 الف خليه يكسب فيها 3 الاف جنيه تبقى ب 25 الف يعنى بياخد مكسب اكتر من 200% ايه النصب دا ؟
طيب ايه الحل يعني احنا طلعن من الحزب الوطني دخلني في الحريه والعداله مفيش تغير الكل مع يحمي رجال الاعمال ومفيش حاجه اسمه مواطن مصري من حقه يركب عربيه ويعيش عشه كريمه الي اذا عد علي غبور او منصور وغرهم لمصلحة مين رفع الجمارك 300 % الي لرجال الاعمل ولك الله ياشعب مصر
إرسال تعليق