الفرق مابين مصنع الطائرات الألمانى و المصرى فى أنتاجه للسيارات أو للتوك توك

كانت شركة بى أم دبليو شركة محركات طائرات طبعا أى شركة طائرات فى العالم لو قررت تعمل سيارة بالتأكيد بتكون خطوة أيجابيه لكن ليها مقاييس معينه و كتيرة عشان تطلع سيارة بالشكل المطلوب و بالأمكانيات المطلوبة و السعر المطلوب , يعنى فى الأول و فى الأخر لازم برضة تجيب ناس بتفهم فى الموضوع دة , و دا إلى عملته شركة بى أم دبليو إنها جابت خبراء و قرروا أنهم يعملوا سيارات و أبتدى يتعمل خطوط أنتاج لحد ماوصلت دلوقتى من أفخم و أقوى و أكثر سيارات العالم عند الكثير من الناس

دى ألمانيا و علاقة شركات الطائرات و شركات السيارات

طيب نشوف مصر بقى و أية علاقتها بشركات الطيران و السيارات

مصر لما قالت تنتج حاجة من مصنع الطائرات و الهيئة العربيه للتصنيع معملتش سيارة زى بى أم دبليو و لا عملت حاجة بمواصفات مطلوبة ولا أمكانيات ولا الكلام دة كله , الشركة دى عملت أغرب أختراع فى التاريخ , "توك توك بشكل عربيه" أو تقدر تقول يعنى توك توك و عامل نفسه عربيه يعنى نفس شكل العربيه , نفس مواصفات التوك توك , بـ3 عجلات برضة , مش عارف يعنى لو كان أتعمل أربعة و بقى توك توك و عارفين أن دة توك توك مكانش حد هيركبة يعنى هوا لازم 3 عشان يتقلب بالناس كل شوية ! , المهم بقى كانت صدمه كبيرة لما لقيت أن يعتبر أكبر كيان يقدر يعمل سيارة مصريه فى الأخر بيعمل توك توك بالمنظر البشع دة و الغريبه أن الأعلان محسسك أن مثلا فيرارى تم أنتاجها ولا حاجة بيقولك صالون فاخر و مراكز صيانه و أشارات بالمرايات الجانبيه و فتحه سقف و زجاج كهربائى , أى نعم دى خطوة جميله جدا لأستبدال التوك توك الهندى بالتوك توك دة لأنه فيه أبواب و أمان أكتر منه رغم أننا كنت أفضل أنه يكون بأربع عجلات عشان ميتقلبش لكن برضة الخطوة دى أكدتلى أن لسه كتير جدا على بال مانعمل سيارة كاملة مصريه , بس إن شاء الله نقدر لو بجد حطينا الموضوع فى دماغنا

صورة التوك توك المتنكر المصرى

Posted in: حلم العمر و أول سيارة مصريه حقيقية